Яңалыклар

Театрда сезон ябылды.

Сабир Өметбаев исемендәге Минзәлә татар дәүләт драма театрында 83нче иҗади сезон А.Коровкинның “Түтиләр” комедиясе белән ябылды. Тантаналы өлештә Минзәлә муниципаль районы башлыгының социаль мәсьәләләр буенча урынбасары Н.Г.Бикеева, Минзәлә театры директоры Р.Ш.Шәймәрдановлар чыгыш ясады.

Узган 83нче сезонда Минзәлә театры өч мәртәбәле фестивальдә катнашты: Казахстан Республикасының Актау шәһәрендә узган Каспий яны илләренең II фестивалендә Хөсәен Җәвиднең “Иблис” трагедиясе зур резонанс тудырды,Казанда узган “Һөнәр” X Бөтенроссия яшь татар режиссурасы фестивалендә “Татар орнаменты. Җанланган бизәкләр” бэби-спектакле һәркемнең күңеленә хуш килде, һәм шушы айда төрки халыкларның XIV Халыкара “Нәүрүз” фестивалендә Михаил Башкировның “Салкын Кын” трагедиясе белән К.Тинчурин исемендәге театр сәхнәсендә бик уңышлы чыгыш ясады.

2019 елда Россиядә игълан ителгән “Театр елы” уңаеннан Минзәлә театры директоры Роберт Шәйхел улы Шәймәрданов инициативасы белән районда театр фестивале бара.Шәһәр һәм авыл балалар бакчалары, шәһәрнең урта белем бирү мәктәпләре, авыл хуҗалыгы техникумы, педагогия көллияте, медицина училищесы коллективлары, районның авыл клублары- һәммәсе әлеге фестивальнең беренче турында катнашты.Көз айларында театр фестивале дәвам итеп, йомгаклау өлеше театрның яңа сезонында булачак, иң осталар биредә, театр сәхнәсендә чыгыш ясаячак.

Яңа сезонда берсеннән – берсе кызыклы премьералар көтелә.Сезнең белән тамаша залларында кабат очрашуга кадәр, хөрмәтле театр сөючеләр!
Нурсибә Адиева, театрның әдәби бүлеге мөдире | 27.06.2019
  • Премьералар

  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру