Яңалыклар

Кара диңгездән - Каспий диңгезенә

Диңгез атамалары географик киңлекне күрсәтү максатыннан аталды. Ә төп бурыч- чираттагы фестиваль турында бәян итү иде.
Июнь аенда Кара диңгез буенда урнашкан Новороссийск шәһәрендә “Кече шәһәр театрлары”нда катнашкан “Иблис” сентябрьдә Казахстан Республикасының Мангыстау өлкәсе Актау шәһәренә, Каспий яны илләренең II Халыкара театраль фестиваленә юл алды.Фестиваль Казахстанның атаклы артисты Нурмухан Жантуринның 90 еллыгына багышланган, җирле театр аның исемен йөртә, фестиваль кысаларында Н. Жантуринга һәйкәл ачу тантанасы узды.

Биш илдән – Рәсәй Федерациясеннән Татарстан һәм Башкортостан, Иран, Төрекмәнстан,Әзербайҗан, Казахстаннан – барлыгы сигез коллектив чыгыш ясады.Һич арттырусыз әйткәндә, “Иблис” тамашачыга көчле шартлау булып тәэсир итте! Алай гына да түгел, Иблис ролен башкарган Рөстәм Зиннуровны яратып һәм шаяртып “Шайтан” дип кенә йөрттеләр, аның белән фотога төшәргә теләүчеләр озын чиратларда басып торды. Гариф ролендә “Тантана” театраль премиясе лауреаты Ильяс Закировның үтә катлаулы автор булып саналган Хөсәен Җәвиднең (Гусейн Джавид) төп героен – ә чынлыкта бит нәкъ Гариф үтерүче һәм иблис- образның линиясен ничек төгәл алып барганын ассызыклады мәртәбәле жюри.Жюри рәисе, СССРның халык артисты Асанали Ашимов:”Татар дусларыбызны без яхшы беләбез, яратабыз, театр сәнгатенең сездә көчле дәрәҗәдә икәне безгә билгеле,”-диде. Артистларыбызның пластикасы, бер йодрык булып ансамбльдә уйнаулары, спектакльнең динамикасы билгеләп үтелде.

Ә нинди кунакчыл казах халкы! Кунакханә яныннан ук милли киемнәрдән, милли ризыклар белән каршы алганнар иде – кайтып киткәнгә кадәр бер минутка да игътибарсыз калдырмадылар. Алар рәхәтләнеп казахча сөйли, без рәхәтләнеп татарча җавап бирәбез – бернинди аңлашылмаучылык юк.Тоташ далада, ком – таш арасында мең ярым километр юл килү дә онытылды, адым саен очраган дөяләргә дә бик тиз ияләштек, йөз меңлек халкы булган Актау каласы үзебезнең Минзәлә кебек күңелгә якын җиргә әверелде. Безнең ерак юлга кузгалуыбызны белеп җирле эшмәкәрләребез спонсорлык ярдәме күрсәтте. Театр дирекциясе “Заиковский” хуҗалыгы җитәкчесе Р.Ш.Фәттаховка, икмәк заводы директоры Ф.Р.Солтановка,”Лига” төзелеш компаниясе директоры Н.Н.Николаевка, “Мир окон и дверей” ИП О.И.Овчинниковага, “Тәкермән” бүлекчәсе җитәкчесе И.Р.Мәүҗиевка, Тулбай хуҗалыгы җитәкчесе И.Г.Загиевка, зур йөрәкле мөлаем ханым Луиза Токаревага чиксез рәхмәтләрен җиткерә!

“Якын булса да торган җир, сагындыра туган җир”, шул. Күпме дуслар таптык без фестивальдә, башка театрларның хезмәтенә карап сокландык, Каспий ярларында йөрдек, бай –мул тормышта яшәгән казах дусларыбыз әле сагындырып искә төшәр! “Иблис” фестивальнең Дипломы, “ТЮРКСОЙ” оешмасы Дипломы, Нурмухан Жантуринның бюсты белән бүләкләнде. Барыбыз да исән-сау Минзәләбезгә кайтып җиттек, без дә гөлбакчада яшибез ләбаса,аның шулай икәненә инану өчен чит җирләргә барып кайту гына кирәк.
Нурсибә Адиева, театрның әдәби бүлеге мөдире | 27.09.2018
  • Премьералар

  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру