Яңалыклар

Минзәлә театрының яңа дуслык күперләре арта.

Урал аръягының үзәге булган Башкортостан Республикасының Сибай шәһәренә 14 сәгатьлек юлга очраклы гына чыгып китеп булмас иде.Россия Федерациясендә дүртенче ел рәттән уздырыла торган “Большие гастроли”дип исемләнгән федераль программа төрле регионнарда эшләүче театрларның бер – берсенә алмаш гастроль оештырып, иҗатлары белән уртаклашу, яңа тамашачы аудиториясен үзенә җәлеп итү максатыннан хөкүмәт тарафыннан финанслана – юл, гостиница расходларына акча бирелә.

Арслан Мөбәрәков исемендәге Сибай башкорт дәүләт драма театры үлеге программага катнашу максатыннан безнең Минзәлә театрына сәнгать җитәкчеләре Д.М.Галимов исеменнән хат белән мөрәҗәгать итте. Театрыбыз директоры Р.Ш.Шәймәрданов тугандаш республикадагы коллегаларның идеясен күтәреп алды, нәтиҗәдә, сибайлылар беренче булып Минзәләдә балалар әкияте һәм “Вәт, ичмасам, ахырзаман” комедиясе белән чыгыш ясап тамашачыларыбызның күңеленә хуш килде. Сабир Өметбаев исемендәге Минзәлә татар дәүләт драма театры Сибай, Баймак, Мәләүз шәһәрләренә О.Уайльдның “Йолдыз егет”әкияте, А.Коровкинның “Түтиләр”сатирик комедиясе белән юлга кузгалды.”Сибай театрына беренче тапкыр Минзәлә театры моннан илле еллар чамасы элек Ф.Бурнашның “Яшь йөрәкләр”әсәре белән килгән иде, кечкенә малай чагындагы хатирәләр бүген дә күңелемдә саклана”, диде,театрның сәнгать җитәкчесе Дамир Галимов, тәбрикләү сүзендә. Минзәлә театрының данлыклы артисты Гадел Галләмов 1954 – 1964 елларда Сибай театрында эшләп, 1964 елдан гомеренең ахырына кадәр Минзәләдә иҗат итә. Әйтерсең күренмәс җепләр бәйләгән, бер – берсеннән шактый еракта урнашкан ике театрның очрашып, танышып, дуслашып калуы дистә еллар үткәч менә шулай кабат яңарды.Озак юлдан соң шулкадәр ачык йөз, тәмле сүз белән каршы алдылар безне коллегаларыбыз.Бернинди киеренкелек,тартынып торулар булмады – тиз арада якын кешеләребезгә әйләнделәр алар. 60 мең халкы булган Сибай шәһәре бик матур, истәлекле урыннары шактый. Театрның директоры вазифаларын башкаручы Айгөл Альбертовна Гайнуллина шәһәрнең тарихи музеена, Сибайның данлыклы карьерына экскурсияләр оештырды – искиткеч тәэсирләр алып хозурланып калдык без ул очрашулардан, тагын бер кат бик зур рәхмәт Сезгә! Балалар спектакленә дә, кичке сеанска да тамашачы залларны тутырып килгән – җылы каршы алып, озак итеп алкышладылар. Шәһәр хакимиятенең мәдәният бүлеге мәдире И.Гомәрова Сибай шәһәре хакимияте исеменнән Рәхмәт хатын спектакльдән соң тапшырды. Ике тугандаш халыкка бернинди тәрҗемәче кирәкми – өстәл артында чәй эчеп күңелле итеп сөйләшеп утырып тагын да якыннанрак танышып калдык.”Сибай – чын башкорт җирлеге, без үзебез дә тамашачы ничек кабул итәр , дип бераз борчылып тордык”, диделәр коллегалар.Барлык шикләр юып төшергәндәй булды, гастрольләребез уңышлы узды. Баймак, Мәләүз шәһәрләре дә оешкан төстә килеп, яратып карадылар. Кайтыр юлда Баймакны узып барганда йомшак койрыклы зур төлке (арттыру түгел, чын) озатып калды.Табигатенә сокланып, тагын килү дәрте белән кайттык Минзәләгә. Шифалы күлләрен, данлыклы мәгарәләрен дә күрергә язсын иде киләчәктә. Хәер, Сибай театры кебекышанычлы дуслар булганда мондый матур хыялларыбыз да чынга ашар,ходай кушса!

Нурсибә Адиева, театрның әдәби бүлеге мөдире | 17.11.2017
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру