Яңалыклар

Иблис образын сәхнәгә чыгарган Рөстәм Зиннуров: Үземнән үзем курка башлаган идем

С.Өметбаев исемендәге Минзәлә дәүләт театры “Кече шәһәр театрлары” федераль проекты кысаларында Хөсәен Җәвиднең “Иблис” драмасын сәхнәгә чыгарды.

Күренекле режиссер Сергей Потапов “Иблис” спектаклен сәхнәгә чыгарып, яңа артистны татар театры дөньясына танытты. Минзәлә театрының “Иблис” драмасында Иблис образы - яшь артист Рөстәм Зиннуровның беренче зур җитди роле. Ул сәгать ярым дәвамында сәхнәдә булып, Иблис образын гәүдәләндерде.

Искәртеп үтәбез, Сабир Өметбаев исемендәге Минзәлә татар дәүләт театры “Кече шәһәр театрлары” федераль проекты кысаларында Әзербәйҗан классигы Хөсәен Җәвиднең “Иблис” драмасын сәхнәгә чыгарды.

Спектакльне күренекле театр режиссеры, “Алтын битлек” театр премиясе лауреаты Сергей Потапов куйды.

“Мин бу рольне алгач, әти-әни: “Үзгәрдең, - дип аптырый башлады. - Шалтыратмыйсың да, үз дөньяңа киттең, сәерләндең”, - диде. “Әни, дим, мин хәзер шулай үз дөньямда яшәп алмасам, кешеләрне куркыта алмаячакмын. Мин хәзер үземнән үзем куркыр дәрәҗәгә җитергә тиешмен”, дим. Әйе, сонгы вакытта мин үземнән үзем курка башлаган идем”, - ди “Иблис” Рөстәм Зиннуров.

“Хәзер инде булды, үземә кайттым, - ди ул елмаеп. - Һәр роль кешене күпмедер үзгәртә, әлбәттә, мин элекке Рөстәм булсам да, рольнең тәэсире кала. Әмма борчылмагыз, Иблискә әверелмим”.

Рөстәм Сергей кебек режиссер белән эшләү яңа баскыч, яңа биеклек дип саный: “Ул безне өскә таба күтәреп ыргытты кебек. Әйе, образны тудыру кыен булды. Әмма без аңа тулысынча ышандык һәм ул әйткәнне сеңдереп барырга тырыштык”, - ди ул.

Сабир Өметбаев исемендәге Минзәлә татар дәүләт театрының баш режиссеры Дамир Сәмерханов Рөстәм Зиннуровның якташы булуын әйтә. “Мин укыган мәктәп егете иде ул. Халык театрында уйнады. Ул төп рольне башкарган елны театр гран-при алды. 1 миллион сумлык гран-прины театрга Рөстәм Зиннуровның уены алып бирде дип саный театраллар”, - ди Дамир Сәмерханов.

Искәртеп үтәбез, Кукмара мәдәният йортының халык театры 2014 елда Гран-прига лаек булды. Әлеге театр белән озак еллар Татарстанның атказанган мәдәният хезмәткәре Рамил Сәләхетдинов җитәкчелек итә.

(Казан, 13 октябрь, «Татар-информ», Рузилә Мөхәммәтова). | 16.10.2017
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру