Яңалыклар

Минзәлә театрының Кырымга сәяхәте.

  Мәкаләнең исемен театр директоры Р.Ш.Шәймәрданов сәфәргә чыкканчы ук әйтеп куйган иде. 1984 елда сәхнәгә куелган С.Шәкүровның “Габсаттар бабайның Кырымга сәяхәте” дигән комедиясен 2 бригада белән Минзәлә театры озак еллар зур уңыш белән уйнап йөрде. Чын сәяхәтнең сәбәбе исә бу елның сентябрь аенда Ялта шәһәрендә узган “Театр. Чехов. Ялта” дип исемләнгән VII  халыкара театр сәнгате фестивалендә Г.Исхакыйның “Сөннәтче бабай” әсәре белән чыгыш ясау булды. Фестиваль комиссиясенә Т.Җүҗәноглуның “Ташкын” әсәре дә тәкъдим ителгән иде. Алар ике әсәрдән “Сөннәтче бабай” ны сайлап алдылар. Безнең театрның “Самими хисләр һәм жанр чисталыгы” номинацисендә бүләкләнүе очраклы хәл түгел, халкыбызның милли гореф-гадәтләрен, сөннәт йоласын зур бәйрәм итеп сәхнәгә куйган режиссер Ренат Әюповның хезмәтен, артистларыбызның эчкерсез уенын жюри  әгъзалары һәм жюри рәисе – ГИТИС профессоры, Мәскәүнең “Школа современной  пьесы” театрының сәнгать җитәкчесе Иосиф Райхельгауз ассызыклап үттеләр. Лауреат дипломын һәм “Хрустальный Фронтон” призын РФнең халык артисты, ГИТИС профессоры Олег Марусев тапшырды. “Просцениум. Вопросы театра” журналы редакторы, театраль критик Марина Тимашева Минзәлә театрының эчкерсезлеге, теленең матурлыгы турында җылы сүзләр әйтте. “Страстной бульвар, 10” журналы редакторы, театраль критик Анастасия Ефремова, театраль һәм музыкаль критик Екатерина Кретова, РФнең халык артитскасы Наталия Егорова, театр һәм кино актрисасы Мария Голубкиналарның һәркайсының фикере бик эмоциональ һәм уңай булды. М.Голубкина хәтта “Я прослезилась”- диде. Кызганчычка каршы, жюри әгъзасы булган күренекле шәхес Леонид Якубович авыру сәбәпле фестивальдә катнашмады. Ялта шәһәре советы рәисе В.Косарев һәм Ялта шәһәре  администрациясе башлыгы А.Ростенколар исеменнән Рәхмәт хатлары алдык.

  Бөек рус классигы А.П.Чехов гомеренең соңгы елларын биредә уздырган, зур әсәрләрен Ялтада иҗат иткән. Фестивальнең исемендә классикның булуы шуңа күрә дә очраклы түгел. Бу елгы катнашкан 13 театрның өчесе А.П.Чехов әсәрләре белән чыгыш ясады. Театр коллективлары Төркиянең Истамбул, Непалның Катманду, Әрмәнстанның Ереван шәһәрләреннән, Россиянең Йошкар-Ола, Төмән, Санкт-Петербург, Ногинск, Севастополь, Тула, Мәскәү, Симферополь шәһәрләреннән килгәннәр. Белоруссия һәм Ираннан килгән коллективлар фестиваль кунаклары иде.

  Тагын шунысы кызыклы, фестиваль барган көннәрдә Ялтада Россия Президенты В.В.Путинның Италиянең элеккеге Премьер-министры С.Берлускони белән очрашуы узды. “Путинны өч метр ераклыктан күрдек”, - диде Р.Ш.Шәймәрданов.

  Фестиваль комиссиясе уздырган экскурсияләр, бигрәк тә теплоходка утырып “Ласточкино Гнездо”га бару истә калды. Табигатьнең матурлыгы, төрле төсләр палитрасы таң калдыра, билгели.

   Күңелнең  иң нечкә кылларын тибрәткән тагын бер чыгыш ясау Севастопольдә, якташ моряк егетләребез янында булды. Шулкадәр җылы, матур очрашу кичәсе беркемне дә битараф калдырмады. Егетләрнең командирына милли түбәтәебезне кидереп, Минзәләдән алып килгән чәк-чәкне тапшырдык. Якташларыбыз күзендә яшьләр ялтырады. “Иң якын туганнарыбызны күргәндәй булдык”, диделәр. Безнең Минзәлә егетләре дә, гомумән, Татарстанлыларның беркайда да сынатмауларына тагын бер кат инандык.

  Минзәлә театры берничә ел дәвамында 9 май-Җиңү көнендә Мамай Курганында урнашкан скульптураларны җанландыра. Шуңа күрә кайту юлында Волгоградка кереп, һәйкәлләрнең “оригинал”ларын күрмичә булдыра алмадык.

  Театр Ялтага Татарстан хөкүмәте бүләк иткән “Хундай” маркалы автобусы белән барды. Бертуктаусыз гастрольләрдән кайтып кермәгән артистларыбыз мондый озын юлны да шактый яхшы кичерде – авыручылар булмады.

  Кара диңгездә су коенып, дөнья күреп, үзебезне танытып кайтты Минзәлә театры. Алда – юбилей сезоны-80 нче иҗади сезон!

 

                                     Нурсибә Адиева,

                                     Минзәлә театрының әдәби бүлеге мөдире

 

 

 

 

--- | 22.09.2015
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру