Яңалыклар

ТЕАТРЛАР САБАНТУЕ.

“Буа-Алан” дип язылган ни татарча, ни русча булмаган заманча «модный» исемле мәйданны күрүгә җиде сәгатьлек сәфәрнең ару-талулары онытылды. Шулай итеп республика театрларының IX Сабантуе быел кунакчыл Буа җирлегендә башланып ките. Театр коллективларына Буа муниципаль районы башлыгы А.К. Айзетуллов, төп оештыручылардан К.Тинчурин исемендәге татар дәүләт драма һәм комедия театры директоры Ф.Н.Мөсәгыйтов, танылган җырчы С.З.Фәтхетдиновлар сәламләү сүзләрен әйтте.

   Һәм ... башланды! Менә биредә сулы көянтә белән берсеннән – берсе җитез артист кызлар ярыша, якында гына татарча көрәш кызып бара, алардан читтәрәк гер күтәрүчеләр эшкә кереште, таяк тартышучылар янып-пешеп кызарып беткәннәр, үзебезнең театр үткәрергә тиешле капчык сугышына керүчеләр дә шактый. Бәйрәм кызганнан-кыза барды. Нәтиҗәдә, Минзәлә театрыннан гер күтәрүдә һәм капчык сугышында Риф Ризатдинов 1 урыннарны, хатын-кызлар арасында таяк тартышуда Рая Егорова 3 урынны, бау тартышуда хатын-кызлар командасы 1 урыннарны алды. Кашыкка йомырка салып йөгерүдә, капчык киеп йөгерүдә, чүлмәк ватуда, бию марафонында да без бик актив катнаштык. Туры колгага менү быелгы сабантуй программасына кертелмәсә дә  Минзәлә театрыннан Риф Ризатдинов махсус күрсәтмә чыгыш сады – туры колгага менеп җитеп төрле фигуралар эшләде. Оештыру комиссиясе Рифне махсус приз – микродулкынлы мич белән бүләкләде.

  Буа тамашачысы турында аерым тукталасы килә. Сабантуй мәйданы эскәмияләрен тутырып утырган буалылар һәр театр коллективын сәламләп, уеннарга көч-дәрт биреп торды. Бәйрәмнең ахырына кадәр беркая кузгалмыйча рәхәтләнеп тамаша кылып утырды алар.

  Курыккан эш хәерле була диләр – бик ерак юлга бисмиллаларны әйтеп сагаеп кына чыгып китсәк тә күңел ачып, ял итеп, дусларны – коллегаларны күреп исән-сау кайтып җиттек. Матур хатирәләр белән истә калырсың, Буа-Алан!

                                        Нурсибә Адиева,

                                         Минзәлә театрының әдәби бүлеге мөдире

--- | 15.06.2015
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру