Яңалыклар

"Нәүрүз" халыкара фестивалендә кунакта (фоторепортаж)

30 май – 3 июнь көннәрендә башкалабыз Казанда унынчы “Нәүрүз” халыкара фестивале булып узды. Театр коллективлары фестивальга Россиянең 9 төбәгеннән һәм 8 чит илдән килгән. Якутия, Төркия, Әзербайҗан, Молдовия, Дагестан, Казахстан, Кыргызстан, Төркмәнстан, үзебезнең Рәсәйдән һәм Татарстан театрлары белән берлектә Минзәлә театры кунак буларак чыгыш ясады. Әле күптән түгел генә Минзәләлеләргә премьерасы күрсәтелгән Л.Воронның “Акча! Акча? Акча...” комедиясе фестиваль кунакларына һәм тәнкыйтьчеләргә тәкъдим ителде.

“Акча! Акча? Акча...” спектаклен Казанда күрсәтү имтихан тоту кебек булды. Тамашачыларга яңа төрле, кызык эчтәлекле, эротик характердагы спектакль карау көтелмәгән булды. Театр тәнкыйтьчеләре сәнгать фәннәре  кандидаты,  “Золотой конек” халыкара фестивале арт-директоры Михкова Ирина, Санкт-Петербургның “Петербужский театральный журнал” ның баш мөхәррире Стоева Надежда, Г.Ибраһимов ис. тел, әдәбият һәм сәнгать институтының фәнни хезмәткәре Сабирова Алина спектакльгә, артистларга карата үз фикерләрен, киңәшләрен әйттеләр.

Театр тәнкыйтьчеләре белән истәлеккә фотога

Әлбәттә тәнкыйтьче булгач тәнкыйть сүзләре булды. Безнең театрга ТР Министрлыгы тарафыннан Г.Исхакый әсәрләрен  киң пропагандалаган өчен Гаяз Исхакый премиясе тапшырылды. Фестивальның ябылу тантанасы 3 июньдә Казанның Мирный бистәсендәге ТР буенча Эчке эшләр министрлыгының уку-өйрәнү үзәге мәйданда оештырылган иде. Тантанада ТР мәдәният министры Айрат Сибагатуллин да катнашты. Бөтендөнья татар конгрессы Башкарма комитеты рәисе Ринат Закиров, Татарстанда шундый мәртәбәле фестиваль уздырылуы безнең өчен зур бәхет, чөнки мондый очрашуларга бик сусаганбыз, Татарстаныбызда, төрки халыкларның бер кисәге буларак, үзебездә якын кардәшләребезне кабул итә алуыбызга бик шатбыз, диде. Мәйдан уртасындагы махсус корылган сәхнәдә төрле театрлар вәкилләре, Татарстан артистлары җырлый, бии, спектакльләрдән өзекләр күрсәтә. Мәйданның бер ягында кашыкка йомырка куеп узыша, көянтә-чиләк белән су күтәреп чабыша, аркан тартыша, кул көрәштерә…  Безнең театр коллективы уеннарда бик актив катнашты. Татарча көрәштә 80 кг. кадәр Илназ Хисматуллин, армреслингта Муллина Рәзилә, капчык сугышында Р.Биктаһиров, сулы чиләк белән йөгерүдә Р.Муллина 1 урынга ия булдылар. 

Әсәрнең тәрҗемәчесе Р.Зәйдулла белән
Л.Гәрәева | 07.06.2011
  • Премьералар

  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру