Яңалыклар

Яшьләргә - юл!

 С. Өметбаев исемендәге Минзәлә татар дәүләт драма театрының иҗади труппасы быелгы сезонда бер төркем яшь көчләр белән тулыланды. Төгәл итеп әйткәндә алар өч кыз һәм дүрт егет. 79 нчы театраль сезонга аяк басканда яшьләргә “Минзәлә театрына нинди хыяллар, нинди планнар белән килдегез?” – дигән сорау бирдек.

- Илдус Кәримов. Минзәлә районы Мияш авылыннан.

   Узган елгы “Идел - йорт” фестивалендә ТРның атказанган мәдәният хезмәткәре Мөслимә Гайниева җитәкләгән Тауасты Байлар авылы үзешчән коллективы белән Д.Салиховның “Булса кодаң генерал” комедиясе белән катнаштык. Сәхнәдә үк, тамашачылар алдында, театр директоры Р.Ш. Шәймарданов белән баш режиссер Д.М. Сәмерханов мине эшкә чакыруларын әйттеләр. Әлеге тәкъдим көтелмәгән шундый көчле тәэсир ясады ки, очып килдем дияр идем, театрга килүемне! Шунда ук Р. Сәхәбетдинованың “Дүрт дус” әкиятендә роль бирделәр, башка рольләрем дә бар. “Эшләргә дә эшләргә” – бүгенге девизым.

     Гөлназ Исмәгыйлева. Минзәлә шәһәреннән.

-          Театр тормышы укытучы, врач, я булмаса сатучы тормышы түгел бит инде, миңа ул һәрчак серле бер дөнья булып тоела иде. Кечкенә чакта мин урындыкка менеп басам да (ул минем сәхнәм) җырлыйм, шигырь сөйлим, пародияләр күрсәтәм. Иң зур хыялым – артистка булу, зур сәхнәдә уйнау... Мин бүген Минзәлә театры артисткасы, татар классикасы әсәрләрендә рольләр турында, башка театрларның танылган актерлары белән танышу турында хыялланам.

Рәзилә Нуриева. Биектау районы Чубар авылыннан.

-          Биш яшемнән җыр-биюгә гашыйк булганлыктан, мәктәпне тәмамлагач театр училищесына укырга керүем үзем өчен хәл ителгән иде инде. Әти-әнием башта бик риза булмасалар да, соңыннан каршы килмәделәр, киресенчә, гел терәк булып, хыялларымны хуплап тордылар. Укыган чорда артист булу теләгем елдан-ел арта гына барды, театр атмосферасына башым белән чумдым. Чын күңелдән булган хыяллар чынга аша икән ул һәм шулай итеп мин бүген Минзәлә театрында артистка! Халык мәхәббәтен яулаган бай тарихлы театрда эшләү зур дәрәҗә. Алдагы көндә сәнгатькә өлешемне кертеп, яңа образлар тудырасы килә. Иҗади активлыгымны, энергиямне сүндермичә, җаваплылык хисен югалтмыйча, сәхнәгә ихлас бирелеп эшләргә телим.

Рөстәм Зиннуров. Кукмара поселогыннан.

-          Кечкенәдән үк мин игътибар үзәгендә булырга ярата идем. Гаилә бәйрәмнәре, туган көннәр, балалар бакчасы кичәләрендә һәрвакыт чыгыш ясадым. Бу мине балалар сәнгать мәктәбенә китерде. Анда узган биш ел вакыт эчендә күп нәрсәгә өйрәндем, һәм, иң мөһиме, киләчәгемне театрдан башка күз алдына да китерә алмаганымны аңладым. Кукмара халык театры режиссеры Рамил Сәләхетдинов чакырып алып М.Кәримнең “Кыз урлау” музыкаль комедиясендә авыл егете ролен биргәч, әлеге теләгем көчәйде генә. Бәхеткә каршы, бүген мин Минзәлә театры артисты! Яхшы драма әсәрендә төп рольләрне уйнау, мөмкинлек булса, кинога төшү – болар бүгенге хыялларым.

 Язгөл Гыйльметдинова . Кукмара районы Балыклы авылыннан.

-          Сәхнәдә уйнау – балачак хыялым. Мәктәптә уздырылган чараларда катнашу, балалар сәнгать мәктәбе, Кукмара халык театры, Казан театр училищесында уку – һәр баскыч саен мин теләгемә якынлаша бардым. Минзәлә театры спектакльләрен еш карадым, артистларына соклана идем. Училищены тәмамлап Минзәлә театрында эшли башлавымны сизми дә калдым. Төрле жанрларда үземне сынап карыйсым килә, барлык сынауларны да үтә алырмын дип уйлыйм.

   Раушан Зиннуров. Кукмара поселогыннан.

-          Балачактан әниемнең җырлавына мөкиббән идем. Сәхнәгә юл башы шуннан, дип уйлыйм. Мәктәптә узган бер кичәдән соң мине Кукмара халык театры режиссеры Р.Сәләхетдинов чакырып алды. Рольләр бирде – Минзәлә театрына мин профессиональ коллективта иҗат итәргә дип килдем, чөнки тормышымны бары тик сәхнәдә күз алдына китерәм. Театр дирекциясе һәм коллективы безне җылы каршы алды – биредә якты йөзле мөлаем кешеләр эшли.

   Илназ Минһажев. Минзәлә шәһәреннән.

-          Барысы да очраклы килеп чыкты, дияр идем, нәкъ шул очраклы хәлләр язмыш таләбе булып чыга. Мин театрда, мин сәхнәдә – күпләр өчен бу бит хыял гына булып кала.

Раушан һәм Рөстәм Зиннуровлар, Язгөл Гыйльметдинова, Илдус Кәримовлар рус халык әкиятләре буенча куелган “Чуртан кушуы буенча” курчак спектаклендә үзләрен күрсәтергә өлгерде инде. Режиссер Альберт Сәхәбетдинов куйган барлык таләпләрне дә үтәргә тырышты яшьләр. Нәни тамашачыларыбыз бик ошатты үзләрен.

    Егет – кызларыбызга иҗади унышлар телик. Театрыбызда озак еллар эшләп, берсеннән – берсе матур рольләр иҗат итүләрен көтеп калыйк.

 

Нурсибә Адиева,

театрның әдәби бүлеге мөдире.

 

--- | 09.12.2014
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру