Яңалыклар

Камал театрын алдык.

   Аркан тартышу буенча егетләребез Казанның Г.Камал исемендәге Академия театры командасыннан эре-эре көрәшчеләрдән торган составын сыдырып кына алгач, директорыбыз Р.Ш.Шәймәрданов йөгереп  тә килде: “Всё! Җиңсәләр Г.Камал театрын алганнары өчен аерым премия бирәм!” – диде. Нәтиҗәдә, Х.Хамматуллин, Ф.Гафаров, И.Кәримов, Р.Бәдретдинов һәм И.Мингазовлар Камал театрын призлы урынсыз калдырып, III урынны алсалар да, бик кәнагать булдылар. Ә аркан тартышу буенча хатын-кызларыбыз исә I урынны яулап бүләккә һәрберсенә музыкаль синтезаторлар алды.

    Сүзем быел Яр Чаллы шәһәрендә Россиядә һәм Татарстанда мәдәният елы уңаеннан уздырылган VIII Республика театрлары Сабантуе хакында бара. Кунак булып Республиканың Дәүләт Советы рәисе Ф.Мөхәммәтшин, Татарстанның мәдәният министры А.М.Сибагатуллин, Яр Чаллы шәһәре администрациясе вәкилләре килү бәйрәмнең саллы булуын исбатлый. Республика районнары башлыклары аерым бүләкләр белән вәкилләр җибәргәннәр. Минзәлә муниципаль районы башлыгы А.Ф.Сәлахов исеменнән милли көрәштә катнашучыларга махсус приз – микродулкынлы мичне – социаль мәсьәләләр буенча район башкарма комитеты җитәкчесе урынбасары Н.Җ.Гильфанов алып килгән иде. Бу бүләккә көрәштә 90 кг кадәр авырлыкта III урын алган Минзәлә театры артисты Илназ Хисмәтуллин лаек булды. Район башлыгы А.Ф.Сәлаховка, Н.Җ.Гильфановка театр коллективы исеменнән зур рәхмәтебезне җиткерәбез.

    Башка уеннарда да театрыбыз сынатмады. Таяк тартышу буенча Рая Егорова I урынны, армреслингта Ленар Миннемуллин III урын, капчык сугышында, туры колгага менүдә Риф Ризатдинов I урын, калакка йомырка салып йөгерүдә Элмира Әхмәтханова II урын, гер күтәрүдә Роберт Хамматуллин  II урын алды. Гөлсинә Хисмәтуллина барысын да шаккаттырып чүлмәкне ватты.

  Сабантуе Минзәлә җирлегенә шактый якын урында уздырылганга микән, быел өстәлләребез дә искиткеч мул иде. ООО “Калинино” җитәкчесе Р.Х.Биктимеров биргән тәмле иттән пылау пешердек, А.Д.Леванов ярышта катнашучылар сусавын бассын дип берничә ящик минераль су бирде, шәхси эшмәкәр, якташыбыз Мәхәсим абый Вәлиев табынга каклаган казлар, пешкән һәм кыздырылган балыклар, пироглар, пешкән һәм кыздырылган балыклар, төрле ширбәтләрне күчтәнәч итеп алып килде. Минзәлә театры исеменнән бик зур рәхмәт сезгә!

   Шушындый күтәренке нотада 78 театраль сезонын ябып Минзәлә театры җәйге ялларга китә. Яңа сезонга яңа көчләр белән аяк басарбыз, дигән уйда калабыз.

 

                                     Нурсибә Адиева,

                                     Минзәлә театрының әдәби бүлеге мөдире

--- | 01.07.2014
  • Премьералар
  • У.Шекспир «Макбет» трагедия 12+

    Режиссер – Сергей Потапов, Саха Республикасының атказанган сәнгать эшлеклесе, Россия Федерациясенең “Алтын битлек” милли театраль премиясе лауреаты Рәссам – сценограф – Валерий Яшкулов, РФнең һәм Калмыкия Республикасының атказанган сәнгать эшлеклесе Костюмнар буенча рәссам – Чулпан Азаматова Хореография һәм пластика буенча режисссер - Нурбәк Батуллин, Россия Федерациясенең “Алтын битлек” милли театраль премиясе лауреаты Король Дунканның данын яклап күп җиңүләргә ирешкән шотланд рыцаре Макбетка өч сихерче фал ача : аңа Шотландия короле булырга язган! Ялган фалга һәм шөһрәт сөюче хатынына ышанып Макбет король Дунканны үтерә, улларын бу үлемдә гаепле итеп калдыра. Яшь варислар илдән качарга мәҗбүр була. Соңрак якын дусты, киңәшчесе Банконы да яллап үтертә һәм тәхеткә утыра. Канлы юл белән властька ия булган җинаятьченең күңеле тыныч түгел, аның күзенә бертуктаусыз үзе үтерткән дуслары күренә. Принцлар да тик ятмый, Макбетның ялганын фаш итеп тәхеткә дәгъва кыла. Макбет белән леди Макбет бер-берсеннән артык дан-шөһрәт яратып тайгак юлдан китәләр һәм кылган җинаятьләр өчен җавап тоту инде котылгысыз...

  • Ч.Айтматов "Җәмилә" мелодрама 12+

    Режиссер – Тимур Кулов Рәссам – Валерий Яшкулов, РФнең һәм Калмык республкасының атказанган сәнгать эшлеклесе Пластика буенча режиссер – Алина Мостаева Спектакль Бөек Җиңүнең 75 еллыгына багышланган. Әсәр унбиш яшьлек үсмер егет Сәет исеменнән сөйләнә. Алга таба ул талантлы рәссам буларак үсеп җитә.Вакыйгалар кыргыз авылында, Бөек Ватан сугышының өченче елы барган чорда бара. Җәмилә – Сәетнең абыйсы Садыйкның хатыны. Сылу, ягымлы, шаян Җәмилә беркемгә дә үзен рәнҗетергә бирми, кешеләргә ул һәрчак ачык йөзле. Килен булып төшкән нигезе ныклы, кайнанасы каты куллы, ләкин гадел хуҗабикә. Кешеләр җитмәү сәбәпле Җәмиләне станциягә икмәк ташырга куялар. Аның ярдәмчеләре – Сәет белән сугыштан яраланып кайткан Данияр. Бераздан Җәмиләнең күңеле Даниярга тартыла башлый. Туктаусыз яңгырларга киткән көннәрнең берсендә Данияр белән Җәмилә авылдан качалар. Җирле халык аларны төрлечә каргый. Бары тик Сәет кенә, аларның чиста мәхәббәте шаһите буларак, Җәмилә ягында була һәм ике йөрәкнең мәхәббәт тарихын башкаларга да җиткерәсе килә. Ул шәһәргә, рәссамлыкка укырга китәргә сорый.

  • Н.Анкилов «Солдат хатыны» драма 12+

    Режиссер – Дамир Сәмерханов, Д.Сираҗиев исемендәге премия лауреаты Рәссам – Сергей Рябинин Композитор – Азат Хөсәенов, ТРның атказанган сәнгать эшлеклесе Пластика буенча режиссер – Чулпан Аскарова,БРның атказанган артисты Спектакль Бөек Җиңүнең 75 еллыгына багышланган. Вакыйгалар ерак Себердәге “Яшел алан” колхозында, Бөек Ватан сугышы елларында бара. Мария Уварова һәм авылның башка хатын-кызлары ирләрен сугышка озатып, тылда хезмәт куялар. Коточкыч сынаулар – ачлык, хәерчелек, ирләренең үлем хәбәре – хәммәсен үз җилкәләрендә кичерәләр. Әсәрдә батырлык һәм хыянәт, якты киләчәккә ышаныч һәм рух төшенкелеге, чиксез мәхәббәт һәм үз-үзеңне корбан итү бер-берсенә үрелеп бара.

  • Дуслар
  • Сораштыру